Yoweri Museveni win Uganda election 2021: Electoral Commission say di president beat Robert Kyagulanyi AKA Bobi Wine

Mr Museveni win almost 59% of di vote, with Mr Wine wey come from behind with about 35%, di Electoral Commission tok.

Mr Wine, wey be former pop star, don earlier vow to provide evidence of fraud. Di Electoral Commission deny say vote-rigging happun for Thursday election.

Sabi pipo wey monitor di elections don criticise di government say dem block internet access.

• Provisional Results from Electoral Commission show say Museveni dey ahead of Bobi Wine
• Uganda opposition candidate Bobi Wine cry out as EU and US observers no go show for election

Mr Wine say e go provide evidence of fraud once di internet don dey restored.

Dis result give President Museveni a sixth term in office.

Di 76-year-old - wey don dey power since 1986 - say e represent stability for di country.

Meanwhile, Bobi Wine - wey be di stage name for 38-year-old Robert Kyagulanyi - say e get di backing of di youth inside one of di world's youngest nations, wia di median age na 16.

On Friday, as di results bin dey come in, Bobi Wine say Ugandan soldiers bin surround im home.